सिंधी समाजाचे कुलदैवत श्री भगवान झुलेलाल सामाजिक सभागृह बांधून मिळावे

फलटण प्रतिनिधी – फलटण येथील सिंधी समाज बांधवांसाठी शहरात सिंधी समाजाचे दैवत श्री. झुलेलाल यांच्या नावाने सामाजिक सभागृहसाठी फलटण शहरात जागा मिळावी व सभागृह बांधून मिळावे अशी मागणी, सकल हिंदू समाज कृती समितीच्यावतीने एका निवेदनाद्वारे केली आहे.

निवेदनात म्हटले आहे की, हिंदू सिंधी समाजातील बांधव फलटण शहरात गेली 75 वर्षाहून अधिक काळ वास्तव्यास आहेत. सिंधी समाजाच्या कुलदेव श्री झुलेलाल आहेत. त्यांना नित्य नेमाने सामाजिक व धार्मिक कार्य व पूजा अर्चा करण्यासाठी सभागृह बांधून मिळावे.
भगवान झुलेलाल हे वरुण देवतेचे अवतार होते, अशी श्रद्धा आहे. भारतीय संस्कृती आणि इतिहासात भगवान श्री झुलेलाल यांचे खुप महत्व आहे. सभागृह नसल्यामुळे सिंधी समाजातील मुलांना लग्नाच्या संदर्भात अडचणी निर्माण होत आहेत, तसेच सामाजिक व धार्मिक विधीसाठी
शहराबाहेर जावे लागते. सभागृह नसल्यामुळे हिदू- सिंधी समाजाचे ब्राह्मण येथे वास्तव्यास नाहीत. समाजिक व धार्मिक विधीसाठी त्यांना प्रत्येक वेळी बाहेरून बोलवावे लागते. त्याच बरोबर सभागृह झाल्यास शैक्षणिक कार्य तसेच ग्रंथालय ई. विधायक उपक्रम सुरू होऊ होतील. या मागणीचा गांभीर्याने विचार करावा असेही निवेदनात म्हटले आहे.