तरडगाव येथे श्रीमंत शिवाजीराजे उद्यानविद्या महाविद्यालय व कृषि महाविद्यालय, फलटण राष्ट्रीय सेवा योजना पुरस्कृत विशेष श्रमसंस्कार शिबिराचा प्रारंभ

फलटण प्रतिनिधी – फलटण एज्युकेशन सोसायटी संचलित श्रीमंत शिवाजीराजे उद्यानविद्या महाविद्यालय व कृषि महाविद्यालय, फलटण यांच्या संयुक्त विद्यमाने युथ फॉर माय भारत/युथ फॉर डिजिटल लिटरसी या घोष वाक्याखाली राष्ट्रीय सेवा योजना पुरस्कृत विशेष श्रमसंस्कार शिबिर सन-२०२४-२५ मौजे तरडगाव, ता. फलटण,जि. सातारा येथे दि. १३ ते १९ जानेवारी-२०२५ या कालावधीत आयोजन करण्यात आले आहे. सदरील शिबिराचे उद्घाटन फलटण एज्युकेशन सोसायटीचे सेक्रेटरी मा. श्रीमंत संजीवराजे ना. निंबाळकर यांच्या हस्ते करण्यात आले कार्यक्रमाचे अध्यक्ष म्हणून मा. आ.श्री.दिपकराव चव्हाण हे उपस्थित होते.

कार्यक्रमाची प्रास्ताविक करताना राष्ट्रीय सेवा योजनेची उद्दिष्टे, स्थापना, पाश्र्वभुमी व शिबिरामध्ये राबवायचे उपक्रम याबद्दल सविस्तर माहिती श्रीमंत शिवाजीराजे उद्यानविद्या महाविद्यालयाचे प्राचार्य डॉ. एस. डी. निंबाळकर यांनी दिली. सदरील कार्यक्रमाला प्रमुख उपस्थित असलेले मा. श्रीमंत संजीवराजे नाईक निंबाळकर यांनी उपस्थितांना संबोधित करताना राष्ट्रीय सेवा योजना शिबिराचे महत्व, ग्रामीण भागाचा विकास, मुलभूत उद्धिष्ये या विषयावर लक्ष केंद्रित केले. श्रीमंत शिवाजीराजे उद्यानविद्या महाविद्यालय व कृषि महाविद्यालय, फलटण येथील राष्ट्रीय सेवा योजनेचे स्वयंसेवक मौजे तरडगाव येथे समाज प्रबोधनपर व्याख्यानमाला कार्यक्रम, प्रभात फेरी, आरोग्य विषयक जनजागृती, जलसंवर्धन आणि जैवविविधता, माती व पाणी परीक्षण, स्त्री सक्षमीकरण व्यसनमुक्ती व आरोग्य सवर्धन, मतदार जनजागृती अभियान, वृक्षारोपण, माती परीक्षण, समाज प्रबोधन, पर्यावरण संवर्धन, डिजिटल लिटरसी यासारखे सामाजिक जिव्हाळ्याचे व कृषि संबधित उपक्रम शिबिर कालावधीत गावामध्ये राबविणार असल्याचे कृषि महाविद्यालयाचे प्राचार्य डॉ. यू. डी. चव्हाण यांनी उपस्थितांना संबोधित केले. मा. श्री. वसंतकाका गायकवाड यांनी महाविद्यालयातील राष्ट्रीय सेवा योजना स्वयंसेवक हे उत्कृष्ट काम करतील असा आशावाद व्यक्त केला व गावातील ग्रामस्थ स्वंयसेवकांना सहकार्य करतील अशी ग्वाही दिली. तरडगाव परिसरातील ग्रामस्थ विशेष करून महिलांनी, युवकांनी सदरील शिबिरामध्ये उत्स्फूर्तपणे सहभाग घेवुन स्वयंसेवकांना सहकार्य करावे अशी अपेक्षा कार्यक्रमाचे अध्यक्षिय मनोगत व्यक्त करताना मा. आमदार श्री. दीपकराव चव्हाण यांनी व्यक्त केली. सदरील कार्यक्रमाला मंडळ कृषि अधिकारी श्री. राहुल खाडे, मौजे तरडगाव गावचे माजी सरपंच, मौजे तरडगाव ग्रामपंचायत सदस्य, मौजे तरडगाव गावातील ग्रामस्थ, महिला, युवक, राष्ट्रीय सेवा योजनेचे कार्यक्रम अधिकारी प्रा. सागर तरटे, प्रा. महेश बिचुकले व स्वंयसेवक उपस्थित होते. सदरील कार्यक्रमाचे सूत्रसंचालन कुमारी तनिष्का दौंडकर व कुमारी श्रद्धा शिर्के व आभार प्रा. सागर तरटे, यांनी व्यक्त केले.