पंढरपूर ते घुमाण संत नामदेव महाराज रथयात्रा व सायकल वारीचे फलटण मध्ये रविवारी आगमन

फलटण दिं.1 – संत शिरोमणी श्री नामदेव महाराज यांच्या जयंतीच्या निमित्ताने श्री क्षेत्र पंढरपूर ( महाराष्ट्र ) ते श्री क्षेत्र घुमाण (पंजाब) या सुमारे ५ हजार किलोमीटर लांब पल्याच्या व ३१ दिवस चालणाऱ्या देशातील पहिल्या अध्यात्मिक रथयात्रा व सायकल वारीचे रविवारी फलटण नगरीत आगमन होत आहे. सायकल वारीच्या स्वागतासाठी फलटण नगरी सज्ज झाली आहे.

भागवत धर्म प्रसारक मंडळ, पालखी सोहळा पत्रकार संघ, श्री नामदेव दरबार कमिटी व समस्त नामदेव शिंपी समाजाच्या वतीने संत नामदेव महाराज यांची ७५५ वी जयंती, कैवल्य साम्राज्य चक्रवर्ती श्री ज्ञानेश्वर महाराज यांचा ७२९ वा संजीवन समाधी सोहळा व शीख धर्माचे संस्थापक गुरुनानक देव यांच्या ५५६ व्या प्रकाश पर्वानिमित्त सालाबादप्रमाणे यंदा रविवार दि. २ नोव्हेंबर ते बुधवार दि. ३ डिसेंबर २०२५ दरम्यान ३१ दिवसांची भव्य रथयात्रा व सायकल वारी आयोजित करण्यात आली आहे. वारीचे हे चौथे वर्ष असून ही वारी महाराष्ट्र, गुजरात, राजस्थान, हरियाणा, पंजाब, दिल्ली, उत्तर प्रदेश व मध्यप्रदेश या आठ राज्यातून प्रवास करणार आहे. या वारीत १५० सायकलस्वार व ५० भजनी मंडळी सहभागी झाली आहेत. देशातील ही पहिली अध्यात्मिक सायकल वारी असल्याचे भागवत धर्म प्रसारक मंडळाचे अध्यक्ष सूर्यकांत भिसे यांनी सांगितले.

कार्तिक शुद्ध एकादशी रविवार दि. २ नोव्हेंबर रोजी पहाटे ५ वाजता संत नामदेव महाराज यांच्या पादुकांची विधीवत पूजा जन्मस्थान पंढरपूर येथे उपमुख्यमंत्री एकनाथ शिंदे यांच्या हस्ते करण्यात येणार असून सकाळी ६ वाजता रेल्वेलाईन , कराड नाका, पंढरपूर येथे रथयात्रा व सायकल वारीचा शुभारंभ भागवत धर्माची पताका फडकावून उपमुख्यमंत्री शिंदे हे करणार आहेत. या कार्यक्रमाचे अध्यस्थान ग्रामविकास तथा सोलापूर जिल्ह्याचे पालकमंत्री जयकुमार गोरे हे भूषविणार आहेत. यावेळी प्रमुख अतिथी म्हणून मा. खा. रणजितसिंह नाईक निंबाळकर, संत नामदेव महाराज यांचे १६ वे वंशज श्री ज्ञानेश्वर महाराज नामदास, धर्मवीर अध्यात्मिक प्रतिष्ठानचे अध्यक्ष अक्षय महाराज भोसले, आ अभिजीत पाटील, आ समाधान अवताडे, आ. राजू खरे, माजी आ प्रशांत परिचारक आदी मान्यवर उपस्थित राहणार आहेत.
सकाळी ८ वाजता वेळापूर येथे या सायकल वारीचे स्वागत माळशिरस विधानसभेचे आ उत्तमराव जानकर हे करणार आहेत तर दुपारी १२ वाजता सदाशिवनगर येथे सायकल वारीचे स्वागत माढा लोकसभेचे खासदार धैर्यशील मोहिते पाटील हे करणार आहेत. नातेपुते, बरड मार्गे ही रथयात्रा व सायकल वारी पहिल्या फलटण मुक्कामी पोहोचेल.

               फलटण नगरीत स्वागत

संत नामदेव शिंपी समाज विठ्ठल मंदिर ट्रस्ट व स्थानिक पंढरपूर-घुमान यात्रा संयोजन समिती च्या वतीने घुमान सायकलवारीच्या स्वागताची जय्यत तयारी करण्यात आली असून क्रांतीसिंह नाना पाटील चौक ते श्री विठ्ठल मंदिर अशी भव्य शोभायात्रा काढण्यात येणार आहे. फलटण मध्ये विधान परिषदेचे माजी सभापती, माजी खासदार, आमदार,जिल्हा परिषदेचे माजी अध्यक्ष व सदस्य, पंचायत समिती सदस्य, नगरसेवक, सामाजिक कार्यकर्ते,विविध संस्थेचे पदाधिकारी आदी मान्यवर सायकल वारीचे स्वागत करणार आहेत .

       सायकल वारीचा समारोप
महाराष्ट्र, गुजरात, राजस्थान, हरियाणा व पंजाब राज्याचा दौरा करीत ही रथयात्रा व सायकल वारी मंगळवर दि. २५ नोव्हेंबर रोजी श्री क्षेत्र घुमाण येथे पोहोचेल . परंपरेप्रमाणे श्री नामदेव दरबार कमिटी व घुमाण ग्रामस्थांच्या वतीने वारीचे स्वागत केले जाईल . बुधवार दि. २६ रोजी श्री क्षेत्र घुमाण (पंजाब) येथे ठाणे लोकसभा मतदारसंघाचे खासदार श्रीकांत शिंदे व माढा लोकसभा मतदारसंघाचे खासदार धैर्यशील मोहिते पाटील यांच्या हस्ते व संत ज्ञानेश्वर महाराज संस्थानचे प्रमुख विश्वस्त योगी निरंजनाथ , धर्मवीर अध्यात्मिक प्रतिष्ठानचे अध्यक्ष अक्षय महाराज भोसले यांच्या प्रमुख उपस्थितीत सायकल रायडर्सचा सन्मान व वारीचा समारोप करण्यात येणार आहे.

यावेळी पालखी सोहळा पत्रकार संघाचे अध्यक्ष शंकर टेमघरे, उपाध्यक्ष सुभाष भांबुरे, सचिव ॲड विलास काटे , सहसचिव राजेंद्रकृष्ण कापसे, खजिनदार मनोज मांढरे, विश्वस्थ राजेंद्र मारणे, राज्य समन्वयक सरबजितसिंग बावा (पंजाब), गणेश उंडाळे (महाराष्ट्र), खेमराज नामा , सीताराम टाक (राजस्थान), मुलचंद परमार (गुजरात), ॲड हरपालसिंग (हरियाणा), महेंद्रसिंग लड्डा (दिल्ली), किशनसिंह राजपूत (उत्तर प्रदेश) व अरुण नामदेव (मध्यप्रदेश) आदी मान्यवर उपस्थित राहणार आहेत.