श्रीराम जन्मोत्सवानिमित्त श्री. शिवप्रतिष्ठान हिंदुस्थान फलटण यांच्या वतीने भव्य मिरवणुकीचे आयोजन

(फलटण/ प्रतिनिधी)-फलटण शहरात प्रतिवर्षाप्रमाणे याही वर्षी श्री. शिवप्रतिष्ठान हिंदुस्थान यांच्या वतीने शहरात श्रीराम जन्मोत्सवाचे औचित्य साधून भव्य-दिव्य अशा मिरवणुकीचे आयोजन करण्यात आले होते.श्री शिवप्रतिष्ठान हिंदुस्थान यांच्यावतीने सायंकाळी ठीक सात वाजता आयोजित केलेल्या मिरवणुकीस फलटण शहरातील श्रीराम मंदिरा पासून विविध मान्यवरांच्या शुभहस्ते श्रीफळ वाढवून या मिरवणुकीला प्रारंभ करण्यात आला.

श्री शिवप्रतिष्ठान हिंदुस्थान यांच्या वतीने काढण्यात आलेल्या या मिरवणुकीला शहरातील व तालुक्यातील असंख्य हजारो तरुणांचा व नागरिकांचा उत्स्फूर्त प्रतिसाद लाभला. श्री प्रभू रामचंद्र, सीतामाई, जय श्री हनुमान व लक्ष्मणाच्या पारंपारिक वेषात अनेक बालचमूणी उत्स्फूर्तपणे व उत्साहाने सहभाग नोंदविला होता. पारंपरिक उत्साह, धार्मिक भावना आणि आधुनिक आकर्षणांचा संगम असलेल्या या मिरवणुकीने फलटणकराचे लक्ष वेधून घेतले.
मिरवणुकीचे प्रमुख आकर्षण म्हणजे श्री. प्रभू रामचंद्र यांची भव्य, दिव्य आणि देखणी मूर्ती होती. व या मूर्ती भोवती केलेली आकर्षक सजावट व सजलेली ही मूर्ती पाहण्यासाठी नागरिकांनी मोठी गर्दी केल्याचे पहावयास मिळाले.

तसेच छत्रपती शिवाजी महाराज यांची सिंहासनावर आरूढ झालेली भव्य मूर्तीही या मिरवणुकीचे खास आकर्षण ठरली. मिरवणुकीदरम्यान आकर्षक दारूगोळा (फटाक्यांची आतषबाजी) आणि रंगीबेरंगी विद्युत रोषणाईमुळे वातावरण अधिकच उत्साहपूर्ण झाले होते.

विविध ठिकाणी सजवलेले लाईटिंग आणि डेकोरेशन पाहून नागरिक मंत्रमुग्ध झाले.डीजेच्या तालावर हजारो युवकांनी उत्साहाने सहभाग घेत “जय श्रीराम”च्या जयघोषात एकच ठेका धरला होता.संपूर्ण परिसर भक्तिमय आणि जल्लोषपूर्ण वातावरणाने दुमदुमून गेला होता. युवकांचा उत्साह आणि शिस्तबद्ध सहभाग यामुळे मिरवणूक अधिक आकर्षक ठरली.संपूर्ण मिरवणूक शांततेत आणि सुरळीत पार पडावी यासाठी आयोजकांनी तसेच पोलीस प्रशासनाने योग्य ती खबरदारी घेतली होती. नागरिकांनीही सहकार्य करत उत्सवाचा आनंद लुटला.

एकूणच, श्रीराम जन्मोत्सवानिमित्त काढण्यात आलेली ही मिरवणूक भक्ती, परंपरा आणि आधुनिकतेचा सुंदर संगम ठरली असून नागरिकांच्या मनात अविस्मरणीय ठसा उमटवून गेली.